اسلام آباد ہائی کورٹ (آئی ایچ سی) نے پولیس کو 9 مئی کے واقعے سے متعلق کیس میں پاکستان تحریک انصاف (پی ٹی آئی) کی رہنما صنم جاوید کو گرفتار کرنے سے روک دیا۔

اسلام آباد ہائی کورٹ نے پاکستان پی ٹی آئی رہنما صنم جاوید کی ایک ہفتے کی حفاظتی ضمانت منظور کر لی ہے۔

تفصیلات کے مطابق اسلام آباد ہائیکورٹ کے جسٹس میاں گل حسن اورنگزیب نے یہ فیصلہ صنم جاوید کی درخواست پر سماعت کرتے ہوئے سنایا۔ عدالت نے صنم جاوید کو ایک ہفتے میں متعلقہ عدالت میں پیش ہونے کا حکم بھی دیا۔

خیال رہے کہ اس سے قبل لاہور کی انسداد دہشت گردی کی عدالت نے 9 مئی کے واقعات میں صنم جاوید اور پی ٹی آئی رہنما روبینہ جمیل کے وارنٹ گرفتاری جاری کیے تھے۔