نیویارک: پاکستان کرکٹ بورڈ (پی سی بی) کے چیئرمین محسن نقوی نے اتوار کو ٹی ٹوئنٹی ورلڈ کپ 2024 میں بھارت کے خلاف خراب کارکردگی کے بعد ٹیم میں ’بڑی سرجری‘ کا اشارہ دیا ہے۔

گرین شرٹس کی شکست کے بعد نیویارک میں پریس کانفرنس سے خطاب کرتے ہوئے محسن نقوی نے کہا کہ بھارت کے خلاف شکست ہر لحاظ سے مایوس کن تھی۔

چیئرمین پی سی بی نے کہا کہ ایسا لگتا تھا کہ پاکستان کرکٹ ٹیم کے لیے ایک معمولی سرجری کافی ہوگی لیکن انتہائی ناقص کارکردگی کے بعد یہ واضح ہوگیا ہے کہ ٹیم کو بڑی سرجری کی ضرورت ہے۔

نقوی نے کہا کہ وہ اچھی طرح جانتے ہیں کہ ٹیم کے اندر کیا ہو رہا ہے اور شکست کی وجوہات کیا ہیں۔

چیئرمین پی سی بی نے کہا کہ پاکستانی کرکٹ اس وقت اپنی کم ترین کارکردگی کی سطح پر ہے۔ ہمارا سب سے بڑا چیلنج ٹیم کی کارکردگی کو بہتر بنانا ہے۔

قوم جلد ایک بڑی سرجری ہوتی دیکھے گی۔ ہمیں چیمپئنز ٹرافی کے لیے ٹیم کو تیار کرنا ہے اور یہ وقت باہر بیٹھے ٹیلنٹ کو موقع دینے کا ہے۔

چیئرمین پی سی بی نے کہا کہ مقصد پاکستانی کرکٹ ٹیم کو دنیا کی بہترین ٹیموں میں سے ایک بنانا ہے۔ قوم کرکٹ ٹیم سے ایسی مایوس کن کارکردگی کی توقع نہیں رکھتی۔

نیو یارک کے ناساؤ کاؤنٹی انٹرنیشنل کرکٹ اسٹیڈیم میں T20 ورلڈ کپ 2024 میں بھارت نے کم اسکورنگ سنسنی خیز مقابلے میں پاکستان کو چھ رنز سے شکست دے دی۔

120 کے مجموعی اسکور کے تعاقب میں پاکستان سات وکٹوں کے نقصان پر 113 رنز بنا سکا اور اسے چھ رنز سے شکست ہوئی۔