وزیراعلیٰ خیبرپختونخوا علی امین گنڈا پور نے پولیس ریسکیو اور دیگر محکموں کے دوران شہید ہونے والے اہلکاروں کے اہل خانہ کو مفت پلاٹ دینے کا فیصلہ کرلیا۔

یہ فیصلہ وزیر اعلیٰ علی امین کی زیر صدارت محکمہ ہاؤسنگ کے اجلاس میں کیا گیا جس کے مطابق پاک فوج اور فرنٹیئر کور (ایف سی) کے شہداء کے ورثاء کو بھی پلاٹ دیئے جائیں گے۔

اس حوالے سے وزیراعلیٰ کے پی گنڈا پور نے کہا کہ پلاٹوں کی الاٹمنٹ کا آغاز سرکاری ہاؤسنگ اسکیموں میں دستیاب 500 پلاٹوں سے ہوگا۔ شہداء کے ورثاء کو پلاٹ دینے کا مقصد لواحقین کی معاشی مدد کرنا ہے۔

علی امین گنڈا پور نے کہا کہ شہداء نے ہمارے محفوظ مستقبل کے لیے جو قربانیاں دی ہیں وہ کسی صورت چکایا نہیں جا سکتا۔

وزیراعلیٰ نے ہنگو، نوشہرہ، پشاور، سوات اور ایبٹ آباد میں شہداء کے لواحقین کو پلاٹوں کی الاٹمنٹ کا عمل تیز کرنے کی ہدایت کی۔