اسلام آباد: نگراں وفاقی وزیر اطلاعات مرتضیٰ سولنگی کا کہنا ہے کہ اعلیٰ عدلیہ کے خلاف بدنیتی پر مبنی مہم میں ملوث 500 سوشل میڈیا اکاؤنٹس کا سراغ لگا لیا گیا ہے۔

نجی چینل کے ایک ٹاک شو میں گفتگو کرتے ہوئے مرتضیٰ سولنگی نے کہا کہ اعلیٰ عدلیہ کے خلاف بدنیتی پر مبنی مہم میں ملوث افراد کا سراغ لگانا متعلقہ محکموں کے پیشہ ور افراد کے لیے کوئی مشکل کام نہیں ہے۔

انہوں نے کہا کہ فیڈرل انویسٹی گیشن ایجنسی (ایف آئی اے) نے اس سلسلے میں ملک کے اندر اور بیرون ملک کام کرنے والے 500 کے قریب سوشل میڈیا اکاؤنٹس کی نگرانی کی ہے۔ انہوں نے کہا کہ عدلیہ مخالف مہم کی تحقیقات کی جا رہی ہیں اور کسی کو بھی معزز جسٹس کے خلاف بدنیتی پر مبنی پروپیگنڈا کرنے کی اجازت نہیں دی جائے گی۔