خیبرپختونخوا کے پہاڑی علاقوں میں موسم سرما سے پہلے کی پہلی برف باری ہوئی جس کے نتیجے میں درجہ حرارت میں کمی واقع ہوئی۔ مانسہرہ میں وادی کاغان میں شدید برف باری ہوئی جس کے باعث سڑکیں بند ہوگئیں۔ برف باری کا سلسلہ دوپہر 3 بجے کے قریب شروع ہوا اور دن بھر وقفے وقفے سے جاری رہا جس سے موسم میں نمایاں سردی پیدا ہوگئی۔

حکام نے احتیاط برتتے ہوئے مانسہرہ-ناران-جلکھڈ روڈ کو بابوسر ٹاپ پر ہر قسم کی ٹریفک کے لیے بند کر دیا۔

خیبرپختونخوا کو گلگت بلتستان سے ملانے والی ایم این جے روڈ کو بھی ہر قسم کی ٹریفک کے لیے بند کر دیا گیا اور پولیس نے بٹاکنڈی کے علاقے سے باہر گاڑیوں اور مسافر کوچوں کے داخلے پر پابندی لگا دی۔ شدید برف باری نے لولوپتسر جھیل اور بابوسر ٹاپ کے آس پاس کے علاقوں کو ڈھانپ لیا۔

ہزارہ ڈویژن کے بالائی علاقوں میں ہلکی بارش ہوئی۔ مختلف پہاڑی علاقوں بشمول سپنگھر، گمتل اور لیلونائی میں برفباری ہوئی جبکہ ضلع کے بشام، الپوری، پورن، چکیسر، شاہ پور، ڈنڈائی، مارتونگ اور دیگر علاقوں میں بارش ہوئی۔

بارش کے باعث بشام شہر اور اس کے گردونواح میں بجلی کی فراہمی معطل ہوگئی۔ مزید برآں، کمالی حلیم زئی، گنداو حلیمزئی اور پنڈیالی سمیت کئی علاقوں میں ژالہ باری نے کھڑی فصلوں کو نقصان پہنچایا۔